Мыйла бур блогйысьны комиӧн?

Этшаӧн блогъяс нуӧдӧны коми кыв вылын. Талун ми бурджык лыддям роч блогъяс - сідз жӧ гӧгӧрвоам. Да и гижны блогеръяслы окота сідз, медым унджыкӧн вермасны тӧдмасьны гижӧдкӧд. А коді рунетын лыддьысьӧ? Дерт, роч лыддьысьыс. Но ме ӧні кӧсъя висьтавны сы йылысь, мыйла бур блогйысьны комиӧн. Кӧть и ог на важӧн нуӧд блог, но мыйкӧ казялі нин.

1. Велалан гижны грамотнӧя, мича кывъясӧн, сідз, мед быдӧнлы окота вӧлі лыддьыны тэнсьыд гижӧдтӧ. Кодлы нӧ окота гижны ӧшыбкаясӧн да асьтӧ лэптыны серамвыв? Збыль кӧ шуны, менам овлӧны ӧшыбкаясыд, "і" колӧ гижны али "ы", торйӧн либӧ ӧтлаӧн... Юала верӧслысь да водзӧ. А позьӧ и кывкудӧ пыравны либӧ кывсӧ вежны.

Ӧттшӧтш и выль кывъяс тӧдмалан, сёрниыд озырмас. Шуӧны, кымын унджык гижан, сымын бурджыка тайӧ уджыс артмӧ. Гашкӧ, коркӧ и небӧг гижсяс?

2. Велалан сёрнитны мича комиӧн. Кыдзи тайӧ артмӧ? Сёрнитігад зэв кокниа шусяс - "Но тарелкаяс вылад наложит первойя блюдосӧ" или "Лок свежӧй воздукнас дышитыштам". А гижны татшӧмтортӧ киыд оз нин кыпав. Мӧвпыштан - вывті нин тешкодь тадз гижны. И вуджӧдан кывъястӧ коми вылӧ. Ӧтчыдысь, мӧдысь, коймӧдысь...А сэсся юрвемад пырас коми кывйыс дай комиӧн и шуан "тарелка" пыдди "тасьті", "думайтӧм" пыдди "мӧвпавны", "рисуйтӧм" пыдди "серпасавны".

3. Коми блогтӧ петкӧдлӧны Вконтактеын. "Коми блогйысь" котырын быд гижӧд вылӧ пуктӧны ссылка, унджык морт медым тӧдмалас тэнад мӧвпъяс йылысь. Быд блогерӧс тайӧ группаас тӧдӧны да кыйӧдӧны.
4. А нӧшта нуӧдсьӧ конкурс коми блогеръяс костын. Блогйысьыс этша, сідзкӧ, вермыны позьӧ кокниджыка. Конкурсӧ пырӧдчыны позьӧ вӧльгым (ноябр) медводдза лунӧдз , бурджыка конкурс йылысь лыддьы татысь. Эмӧсь козинъяс абу сӧмын вермысьяслы, но и быд пырӧдчысьлы. Мый не бур?

5. Тэнад гижӧдыд вермас веськавны коми газет-журналӧ. Став коми мортыс республикаысь лыддяс тэнӧ. Сідз, менам гижӧд "Кыдзи сёрнитны кагакӧд комиӧн карын" петавліс "Коми му" да "Йӧлӧга" газетъясын. Збыль шуа - сьӧлӧмтӧ шонтӧ, да окота нӧшта на гижны. Дерт, колӧ гижны лыддянатор йылысь, а оз "мый аддза, сійӧ и сьыла". Ме абу на бур блогер, овлӧ, гижа и сідз, и тадз. Но ӧд пыр водзӧ.

Со татшӧм вит помка ме аддзи, медым гижны коми кыв вылын блог. Гашкӧ, тіянлы нӧшта на кутшӧмкӧ сюрас? Юксьӧй комментарийясын асланыд мӧвпъяснад!

P.S. Ыджыд аттьӧ "Чушканзі" журналлы серампетана серпасъясысь!