Карын уна коми мам-батьлӧн быдмӧны роч кывъя кага. Менам тӧдсаяс шуӧны, мый тадзи, чужӧмсяньыс роч кывйӧн сёрнитігӧн найӧ дасьтӧны ичӧт мортӧс садик кежлӧ, кӧні став челядьыс роч. Ме зэв бура гӧгӧрвоа - быд бать-мамлы окота, медым кагаыс кокниа велаліс садйӧ, выль челядь дорӧ. И чайтсьӧ, мый роч кыв вермас талы сетны унджык позянлун. Та вӧсна весиг сиктын, пӧль-пӧч, ыджыд мам-бать ордын гӧститігӧн пыр тшӧкыдджыка кылан роч сёрни карса ичӧт челядьсянь.
Збыль кӧ шуны, менам чайтӧм серти, ставыс дзик мӧдарӧ. Карын быдлын кылӧ роч сёрни - магазинын, поликлиникаын, челядь площадкаяс вылын, сійӧ жӧ телевизорыс лун-лун мыйкӧ висьталӧ рочӧн. Тадзи быть велалан роч кывйӧ. Коми кывтӧ он на тай сэтшӧм тшӧкыда кыв карса олӧмын.
И ме думыштчи - а кӧні Сыктывкарын позьӧ кывны коми кыв? Гортын кындзи? Со мый менам артмис.
1. Спектакльяс, концертъяс, мукӧд петкӧдчӧм. Гежӧда, дерт, но ми ветлӧдлам театръясӧ да концертъяс вылӧ, кӧні артистъяс петкӧдчӧны коми кыв вылын. Видзӧдысьясыс локтӧны векджык коми йӧз, век паныдалан тӧдсаясӧс, бызгыштан накӧд комиӧн. Кага ставсӧ кылӧ))) да сюркнялӧ пель саяс. Тані позьӧ казьтыштны и коми КВН, и "Мича Райда" конкурс, "Кужам сьывны, кужам и ворсны" фестиваль да уна мукӧд.
2. "Шуда котырлӧн" чукӧртчӧмъяс. Ми ветлім выльвоасьны да велӧдчыны пӧжавны картупеля шаньга. Медводдза пандасьлігас меным вӧлі зэв тешкодь кывны коми сёрни челядьсянь. Думыштлӧй - 5 во кагакӧд сёрнитам комиӧн, а веськалі быттьӧ мӧд планета вылӧ! Таӧдзсӧ некор эг кывлы коми сёрни мукӧд челядьсянь карса олӧмын... Менам быттьӧ муыс бергӧдчис.
Коми шаньга пӧжалігӧн кыдзкӧ велалӧма нин вӧлі кывны коми сёрни челядьсянь, быттьӧ сідзи и колӧ.
3. Маршак нима челядь библиотекаын эм краеведение да коми литература отдел, ичӧт челядьлы "Зиль-Зёль" торъя жыр. Сэні уджалӧны коми йӧз, позьӧ волывлыны тӧдмасьны книгаясӧн, ворсны. Кор сэтчӧ бӧръяысь ветлісны Ёгор да Ӧльӧш, налы весиг козьналісны кык выль небӧг.
4. Коми кывъя челядьӧс окотапырысьджык корӧны пырӧдчыны уна пӧлӧс мероприятиеӧ. Сідз, ми петкӧдчим "Хоровод дружбы" конкурсын, коркӧ корлісны миянӧс "Ас му вылын" передача вылӧ. Кык во чӧж дасьтысим "Ӧшка-мӧшка" фестиваль кежлӧ, кӧні сьылӧны-йӧктӧны-кывбурасьӧны комиӧн, но Ёгор быд пӧрйӧ висьмывліс да сідз эг и веськавлӧй.
Гашкӧ, ті нӧшта на тӧданныд "гуся" местаяс? Юксьӧй!
Иван Куратовлӧн литературнӧй музейысь да Коми культура шӧринысь нӧшта позьӧ кывны, землячествояслӧн чукӧртчылігъясӧн - но тайӧ ёнджыкасӧ гырысьяслы, а абу челядьлы.
ОтветитьУдалить