Юксьыны

четверг, 8 марта 2018 г.

Мыйла быть ветлыны Лямпиада вылӧ?

Ыджыдвидз сиктын кык лун мысти нин воссяс Лямпиада - лямпа вылын котралысьяслӧн чемпионат. Кодъяскӧ воысь во ветлӧдлӧны сэтчӧ, а кодъяскӧ медводдзаысь кылӧны татшӧм гаж йывсьыс. Унаӧн мунасны сэтчӧ панъясьны. Мыйла нӧ эськӧ позьӧ ветлыны Лямпиада вылас, асьныд кӧ онӧ кӧсйӧй котӧртны?



1. Гажыслӧн аслыспӧлӧслун.
Дерт, таво со и Удораын нуӧдісны лямпа вылын котралӧмъяс, и Чилимдінӧ корӧны, но медводдзаысь лямпаяс вылын панъясисны Ыджыдвиддзын. Тані позьӧ видзӧдны и биатлон, дерт, лямпаяяс вылын. Меным биатлонсӧ эз на мойви аддзывны, гашкӧ, таво сюрас кад висьыштны лямпаа биатлонистъяс вӧсна. А асьныд кӧ пырӧдчанныд тайӧ котралӧмас - нэмсӧ позяс казьтывны!



2. Сиктыслӧн мичлун.
Ыджыдвидз сикт - тайӧ важся сикт, медводдза гижӧдыс паныдасьӧ 1608 воын на. Ачыс сиктыс водӧма Висер ю пӧлӧн, тані олӧ сюрс сайӧ морт. Позьӧ видзӧдлыны важ вичко, уна керка йӧр мичмӧдӧма, позьӧ снимайтчыны Йиркап дорын.




3. Выль тӧдӧмлунъяс.
Шуам, медводдза кык помкаыс сідз нин сетасны выль тӧдӧмлунъяс. Сӧмын тайӧн ӧд гажыс оз помась. Позяс пыравны школаса музейӧ, сэні уджалысьяс да велӧдчысьяс чукӧртісны збыль интереснӧй материалъяс Ыджыдвидзса история да олӧм йылысь, Татысь ті аддзыланныд важся утварь, фотояс да мукӧддтор. Та кындзи, сувтӧдасны чум, кӧні позяс тӧдмасьны войвывса кӧр видзысьяслӧн олӧмкӧд.


4. Гажӧдчыштны да лолалыштны ывлавывса сынӧднас.
Лямпиада дасьтысьяс лӧсьӧдісны и неыджыд гаж, кӧні кутасны сьывны-йӧктыны сиктса коллективъяс. Быть колӧ кывзыны, кыдзи сьылӧны Выльыбса клубысь анъяслӧн чукӧр! Ок и ливкйӧдлӧны!
Позяс и ньӧбасьыштны, ывла вылас лоӧны вузасян палаткаяс. Да и ачыс Лямпиадаыс кутас мунны ю бокын, сынӧдыс чӧскыд, лолалан да выльыс ловзян!




5. Коми сёрни.
Кыдз нӧ коми сёрнитӧгыс коми сиктын? Челядьӧс кӧ босьтанныд аскӧдныд - нӧшта на бур, мед кывзасны да сёрнитасны комиӧн, торйӧн нин, найӧ кӧ карын быдмӧны. Зэв бур практика налы лоӧ!
    Но мый, пуксьӧй машина либӧ автобус вылӧ да мӧдӧдчӧй! Бур туй!



Комментариев нет:

Отправить комментарий