Йирым тӧлысь - октябр. Шоныд войтъяс.

Октябр помасис, а ме пасйышта, кыдзи сійӧ коли.

Тӧлысь заводитчигас верӧс муніс экспедицияӧ чукӧртны фольклор, а ми челядькӧд, дыр думайттӧг, журнитім Висер вожӧ, челядьлӧн ыджыд мам да ыджыд батьыс ордӧ. Шойччим, лолалім чӧскыд сынӧднас, чукӧртім бӧръя тусь черноплодкалысь. Ыджыд мамыс косьтіс тусьсӧ, а сэсся кутам юны чӧскыд чай кузь тӧвся рытъясӧ.

Ӧктім чӧскыд тусь

Сиктын олӧмыс дзик мӧд - надзмӧ, некутшӧм лишнӧй шум абу. Ӧні интернетын ёна гижӧны сы йылысь, кыдзи этшмӧдны олӧмын ковтӧм шум, юӧр, ӧд. Психологъяс корӧны петны соцсетьясысь, кусӧдны телевизор, дугдыны лыддьыны выльторъяс - вывті пӧ сьӧкыд ӧнія мортлы та мында юӧрсӧ юрын видзны. А мунан сиктӧ - со тэныд и сідз шусяна релаксация. Шойччы да гуляйт сӧмын.

Карын нин ветлім Светлана Горчаковалӧн юбилейся концерт вылӧ. Кывзім сьыланкывъяс, видзӧдім  ичӧтик сценкаяс. Рита тшӧтш миянкӧд ветліс, медводдза чассӧ бура видзӧдіс, сэсся мудзис да петім. Кор ми челядькӧд мунам театрӧ, ме век тӧд вылын кута, мый медшӧрыс - абу быть видзӧдны помӧдзыс. Медшӧр могыс миян - петкӧдлыны челядьлы олӧмсӧ быд бур боксянь.

Концерт вылын

Помалім ассьыным медводдза мультфильм, вӧчим коми кыв вылын. Вот тайӧ драйв! Кымын радыс миян асланым ӧніӧдз на! Видзӧдісны интернетысь унаӧн, унаӧн гижисны-ошкисны. Ӧткымынӧн гижисны, мый мультфильм нимас ми вӧчим ӧшыбка, колӧ пӧ гижны "понйӧн", тадз пӧ словарын гижӧма. Гашкӧ, и сідз. Ме ачым век шуа "понйӧн". Коми кыв туялысь серти, ми неправильнӧя гижим сӧмын ӧтитор - кӧиныс "пӧрӧ" понмӧ, а оз "ло". "Лоӧ" роч кывйын. Со кыдз на вӧлӧм.

А со и кӧин

Ме зэв бура видзӧда татшӧм критика вылӧ - сійӧ отсалӧ водзӧ вылӧ бурмӧдны миянлысь уджнымӧс, тӧдӧмлун, сёрни. Та вӧсна энӧ полӧй, гижӧй, висьталӧй, мый оз кажитчы, мый колӧ бурмӧдны.
Став семьяӧн ветлім С. Маршак нима челядь библиотекаӧ. Дерт, пыралім "Зиль-зёль" коми жырйӧ. Сэні эм некымын ворсӧм коми кыв вылын, мукӧдсӧ зэв кокни вӧчны гортын. Сідз, меным ёна кажитчисны карточкаяс, кӧні ӧтар боксянь гижӧма кывбур, а мӧдар бокас серпас. Чайтӧм серти, тайӧ зэв бур ворсӧм ичӧт, кык-куим арлыда, челядьлы. Шуам, ме сьӧкыда запоминайта коми кывбуръяс, а коми кывъя кагатӧ быдтігӧн кыдзкӧ тешкодь лыддьыны роч кывбур. Вот вӧча татшӧм карточкаяс, и кута тӧдмӧдны Ритаӧс коми кывбуръясӧн.

Ёгор лӧсьӧдӧ кыв

Егорлы тшӧтш сюри сы арлыдаяслы ворсӧм. А небӧгъясыс миянлы ставнымлы сюри!
Со тадзи коли миян коми кывъя тӧлысь. А кытчӧ ті ветлінныд? Мый аддзылінныд? Гижӧй, юксьӧй!
Окота кӧ медводдзаӧн тӧдмавны менсьым выль мӧвпъяс - гижӧдчӧй блог вылӧ!