Кыдзи кагаӧс позьӧ велӧдны коми кывйӧ?

Уна бать-мам пузчужӧм дзолюкъяскӧд сёрнитӧны комиӧн. Но воӧ кад, кагук быдмыштӧ да мунӧ роч садйӧ. Унджыкыслӧн та вылын помасьӧ коми кывъя сёрниыс - кага рочмӧ. Неважӧн на ӧти мам меным висьталіс, дзикӧдз пӧ рочмис менам пи, кӧть и бать-мамыс коми. Батьыс пӧ шуӧ - он кӧ комиӧн сёрнит, ме тэнӧ ог гӧгӧрово! А кага век ӧтарӧ рочасьӧ. Кыдз нӧ эськӧ позьӧ коми кывсӧ видзны? 

Дерт, лыддьысьны коми кыв вылын. Эм зэв уна коми мойдъяс, эм небӧгъяс, кӧні мойдсӧ гижӧма и роч, и коми кыв вылын. Татшӧм небӧгсӧ позьӧ лыддьыны медводз комиӧн, сэсся рочӧн - либӧ мӧдарӧ, медым кага гӧгӧрвоас ставсӧ, мый гижӧма. Ас кадӧ ми вӧлам юасям Ёгор пилысь, кутшӧм кыв вылын талун лыддям мойд? Збыль кӧ шуны, мукӧд кывсӧ ме и ачым ог гӧгӧрво вӧлі, видзӧдла роч вариантсӧ, гӧгӧрвоа да сэсся висьтала кагалы.

Лыддьыны позьӧ и коми журнал "Бикинь" - сэні тшӧкыда овлӧны ичӧтик мойдъяс шӧр лист бокас. Судзӧдны абу ёна дона, босьтны кӧ веськыда Печать керкаысь - нӧшта на донтӧмджык. Тадз позьӧ велӧдны кагаӧс и ас киӧн вӧчасьны - вундавны листсӧ да крепитны ӧта-мӧд дорас сідз, медым артмис ичӧтик небӧг. А вӧчасигӧн сёрнитны, мый йылысь нӧ гижӧма тайӧ мойдас? "О, видзӧд, ошкӧс серпасалӧма! А час лыддям дай тӧдмалам!". Тайӧ кывъяснас нин ми восьтам интерессӧ коми мойд дорӧ.

Челядь радейтӧны гортса театр - вуджӧръяса либӧ чуньвыв аканьяса. Позьӧ думыштны персонажъясӧс, налысь характер, история - кытысь найӧ, мыйла комиӧн сёрнитӧны. И ворсны коми кыв вылын.

Вуджӧра театрын миян вӧліны привидениеяс

 Поликлиникаын виччысигӧн, автобусын или туй кузя мунігӧн позьӧ ворсны кывъясысь - кутшӧм шыпас вылӧ помасис кыв, сэтшӧм вылӧ шуны мӧд кыв, водзвыв сёрнитчыны шуавны сӧмын коми кывъяс. Ичӧтджыкъяскӧд медводз сьӧкыд ворсны - налы сьӧкыд на гӧгӧрвоны шыпасъястӧ, но миян сэсся кутіс артмыны, вель ёна ворслім гортын.

Медым велӧдны комиӧн лыдпасъяс - эм зэв бур ворсӧм "Русское лото". Колӧ сӧмын ворсігас лыдпасъяссӧ комиӧн шуавны - зэв ӧдйӧ велалан шуавны "нелямын ӧти" да "кӧкъямысдас вит". Весиг ме сьӧкыда вӧлі комиӧн лыдпасъястӧ шуала, а тайӧ ворсӧм бӧртиыс ачыс артмӧ. Пи йылысь нинӧм нин ог шу - дзоля челядьлӧн мозгыс ёна кокньыдджыка ставсӧ велӧдӧ.

Унджык сёрнитӧй коми пӧль-пӧчкӧд. Ӧні уналӧн нин сиктын эм интернет, компьютер. Позьӧ звӧнитны налы скайп пыр, медым ичӧт нукъяссӧ аддзылісны, ӧттшӧтш и комиӧн сёрнитісны. Эм и мукӧд дон босьттӧг приложениеяс смартфон вылӧ, медым звӧнитчыны позис. А дзонь гожӧм кежлӧ кӧ ыстыны челдьӧс коми сиктӧ, найӧ дзик коми лоӧны!

- Сьывны коми сьыланкывъяс, велӧдны коми кывбуръяс. Ми тшӧкыда велӧдам коми кывбур. Сэсся Ёгор висьтавлӧ садйын утренникъяс вылын.

- Асныдлы сёрнитны комиӧн. Кага некор оз велав сёрнитны комиӧн. асьныд кӧ сыкӧд рочасянныд!

Быд бурсӧ тіянлы кага быдтӧмын!