Юксьыны

пятница, 7 октября 2016 г.

Ворсыштам медся ичӧтикъяскӧд

Талун ме вӧзъя ворсыштны. Менам медводдза кага чужигкежлӧ юрын абу нин кольӧма вӧлі ни ӧти ворсӧм, мыйысь позис ворсны дзолюкъяскӧд. Та пыдди тӧда вӧлі уна роч ворсӧм гырысьджык челядькӧд, вожатӧйӧн уджавлі да быдторйӧ велавлі.
А кор чужи Егор, ковмис выльпӧв казьтыштны лелькуйтчан ворсӧмъяс. Гашкӧ, эмӧсь жӧ ме кодь том мамъяс, кодъяс оз тӧдны татшӧм ворсӧмъяс?

1. Катша рок пуис-пуис,
Пуис-пуис катша рок.
Ӧти чунь нямис,
Мӧд чунь нямис,
Коймӧд чунь нямис,
Нельӧд чунь нямис,
Витӧдыс ставсӧ кураліс-караліс.
Катшалы нинӧм эз коль.
Катша бара пуис рок,
А ваыс абу.
Муніс вала, мунӧ-мунӧ,
А кыдз тай гымыштіс,
Катшаыд лэбулӧ и дзебсис.
(ки пыдӧсас ворсам)

2. Батьыд карад ветліс? - Ветліс.
Гудӧктӧ ньӧбис? - Ньӧбис.
А позьӧ ворсыштны? - Позьӧ.
(пидзӧс вылын кага пукало, юасям, а бӧрыннас гильӧдам киняувтіыс)

3. Рӧдтім-гӧнитім, ылӧ-ылӧ скачитім,
Сьӧд вӧр шӧрті, паськыд полеті,
Берег пӧлӧнті
Ыджыд мамыс дорас, ыджыд батьыс дорӧ,
Чӧскыд роксӧ сёйны, чӧскыд йӧльӧсӧ юны.
Кильчӧ дорас воим, кильчӧ дорас гуран,
Гуранас штёп усим!
(пидзӧс вылын пукӧдам, а сэсся уськӧдам джоджӧ)

4. Кекӧнач, кекӧнач,
Ыджыд мамыс ломтіс пач.
Шуӧ, гӧститнытӧ лок,
Пуа тэныд чӧскыд рок.
Лэбам-лэбам-лэбам да шлыв пуксям юр вылас,
Крыша-вевтсӧ кисьтім.
(кинас кекӧначасям, сэсся юр вылас шлывкнитам кияссӧ)

5. Дзюми-люки локтӧ,
Код дорӧ нӧ локтӧ?
Рита дорӧ локтӧ.
Голя улас люп-люп пыралас,
Киняулас дзоп-дзоп дзопалас!
(гильӧдам кагуксӧ).

Дерт, татшӧм ворсӧмъяслӧн эм уна вариант, менам ёна кывъяссӧ вежлалӧма - кыдзи меным аслым ёнджыка кажитчӧ, сідзи и мойда. Небӧгъясын мӧд нога гижӧны дай. Но ӧд медшӧрыс - дзолюклы гажа.
А кутшӧм ворсӧмъяс ті тӧданныд - медся ичӧт дзолюкъяслы?

Комментариев нет:

Отправить комментарий