Юксьыны

суббота, 8 октября 2016 г.

Кӧч тӧлысь - сентябр. Шоныд войтъяс

Ывла вылын октябр, а ме гижышта сы йылысь, кыдзи коли миян кӧч тӧлысь.
Сентябр 8-ӧд лунӧ Егорлы тыри 6 арӧс. Во быд виччысис да коркӧ лоис жӧ квайт арӧсыд. Ӧні сэсся юасьӧ, кор сылы тырас сизимыс.

Бӧръя во ветлӧдам садикӧ. Заводитчис миян школа кежлӧ дасьтысьӧм - садйын нуӧдісны мам-батьяскӧд чукӧртчӧм, висьталісны, кыдзи колӧ кагасӧ лӧсьӧдны школаын велӧдчиг кежлӧ. Ми думыштчим сы йылысь, медым Ёгорӧс сетны "Школа будущего первоклассника"-ӧ. Но бара жӧ ог тӧдӧ, кутшӧм школаӧ сетны. Медшӧрыс - окота, медым кага велӧдіс коми кывсӧ кыдзи чужан кыв. Орчча школаыс матын, вуджны сӧмын стадион колӧ, но сэні коми кывтӧ велӧдӧны кыдзи канмуса (государственнӧй). Коми национальнӧй гимназия йылысь эськӧ мӧвпалам, но сійӧ ылынджык, автобусӧн мунны колӧ. Со татшӧм виччысьтӧм юр песана мытшӧд миянлы паныдасис. Эм на пӧшти во, медым думыштны да воны кутшӧмкӧ кывйӧдз.
Риталӧн гожӧмбыднас заводитісны артмавны медводдза кывъяс. Мам, пап, баба, бобо, апа, дядя, нянь - бура нин гӧгӧрвоам, мый кӧсйӧ миянлы висьтавны ичӧтик нылук. Висис, сэсся куйлім больничаын...Век полі веськавны инфекционнӧй больничаӧ, да со тай, веськавлім. Дерт,тайӧ абу шуда здук, но бурыс эм - ӧні сэсся ог пов.

Больничаын орчча крӧвать вылын куйлісны Выльгортысь мама-пиа. Мамыс коми, пиыс роч. Батьыс пӧ роч, да сы вӧсна пӧ быдтам пинымӧс роч кыв вылын. "Аттьӧ" кыв пӧ сӧмын тӧдӧ коминас. Гажтӧм татшӧм кывъяссьыс. Но ме век рад сёрнитыштны комиӧн тӧдтӧм йӧзкӧд, кагаяс кылӧны да велалӧны сы дорӧ, мый и карын ми сёрнитам чужан кыв вылын.
Миян семьяын лоис выль лов - шонді рӧма каньпи. Шуим Бикиньӧн. Аминь вильыш, курчасьӧ, парсасьӧ да зэв гора кургӧ.

Воддза каньыс тшӧтш коми нима вӧлі - Шань кань. Тӧдса вӧлі локтас да век медводз юалас - кӧні нӧ тіян Шань Олысяыд? Сійӧ кадӧ, кор миянын овмӧдчис Шань кань, лыддям вӧлі А.Поповлысь "Шань олыся" висьт.

Дзик нин тӧлысь помас ветлім Кулӧмдінӧ кӧлысь вылӧ. Том гозъялы корсим коми открытка - сюри "Ордым" лавкаысь, коді Печать керкаын. Ёна нимкодь сьӧлӧм вылын аддзыны татшӧм открыткаяс, сӧмын тай гижӧны ӧшыбкаясӧн - то чут вунӧдӧмаӧсь пуктыны, то предложениесӧ дзоля шыпассянь заводитӧны. Кыдз нӧ тадз позьӧ?
Но а сідз олӧмыс мунӧ водзӧ, юрын то ӧтитор, то мӧдтор, унатор окота вӧчны да дышыс менам ещӧ на унджык))))


Комментариев нет:

Отправить комментарий