Юксьыны

воскресенье, 30 октября 2016 г.

Телевизор-интернеттӧг олӧм - гажтӧм али абу?

Вежон сайын Ёгор пилы вӧзйи - а вай вӧчам телевизортӧм лун. Лунтыр огӧ видзӧдӧй телевизор. Егорлы тайӧ кажитчис, сӧмын содтіс, мый сійӧ кӧ лунтыр кежлӧ кольӧ мультикъястӧг, то и меным оз позь пыравны интернетӧ, лыддьыны смартфон. А пыралӧмсьыд пӧ мынтан меным штрап - 100 шайт! Сӧмын пӧ середа да вӧскресенньӧ кутам видзӧдны.

Бӧръя каднас Ёгор заводитліс уна видзӧдны мультикъяс - то висьмӧма да куйлӧ диван вылын, дзоргӧ телевизор, то ыджыдджык воча вокыскӧд ворсӧм пыдди ноутбукӧ шашаритчӧмаӧсь, то чай юигмоз бара жӧ телевизорӧ кыйкъялӧ. Аминь ёна менӧ тайӧ дӧзмӧдны кутіс. Челядьыд ещӧ мультик видзӧдігӧн дзик вошлӧны - нинӧм оз кывны ни оз аддзыны, кӧть йӧкты на водзын, кӧть дасысь кор. Сы выйӧдз налы интереснӧ экранвывса олӧм.

Коркӧ удж кузя мойвиліс меным видзӧдны неыджыд видео-удж диснейса мультикъяс йылысь. Сэні висьталісны, кыдзи мультфильмъяс пырӧны ичӧт мортлы сознаниеяс да вежӧны сылысь поведениесӧ.  Сідз, нывъяссӧ серпасалӧны ыджыд синмаӧн, вӧсни коска, крут сітан бекъяса да мича морӧса. Ичӧтик нывка видзӧдӧ татшӧм героиня вылӧ да тшӧтш кӧсйӧ лоны сы кодь. Уна мультфильмын нывъяс смелджыкӧсь да ёнджыкӧсь зонъяс серти, зонъяс векджык йӧйкодьӧсь, полысьӧсь. Кыдз чайтанныд, кутшӧмӧн быдмасны миян челядь татшӧм мультикъяс видзӧдӧм бӧрти?
Вывті восьса паськӧма
 Кор ме видзӧда Дисней каналысь мультикъяс, век шензя, кодлы юрас воис серпасавны татшӧм несуразнӧй персонажъяссӧ? Ӧти синма, ныр-пель пыдди трубка, квадратнӧй, квайт киа... Мый серпасалысьыс куритіс/исаліс/юис? Сёрнитӧны ёсь гӧлӧсӧн, юрад пырӧ да дӧзмӧдӧ, ачыс сёрниыс налӧн мисьтӧм кывъяса. Персонажъясыс ӧта-мӧдсӧ пыр видзӧдӧны увтыртны, серавны ёрт вылас, чужйыны-вачкыны, быттьӧ сідз и колӧ. Ме нинӧм нин ог шу сэтшӧм мультфильмъяс йылысь, кодъясӧс вӧчӧны ыджыдджык арлыдалы, сэні и тышкасьӧны, и вийны вермӧны. Психологъяс серти, ичӧт арлыда челядь оз гӧгӧрвоны, мый телевизорын мультикъяс да кино ставсӧ думыштӧма, абу збыльвыв серпас. Найӧ чайтӧны, мый тайӧ ставыс збыль, да велӧдчӧны вӧчны сідз жӧ, кыдзи и мультикса серпасалӧм герой.
Кутшӧмкӧ гӧгӧрвотӧм геройяс
Та кындзи, Дисней каналті мультикъяс мунӧны ӧта-мӧд бӧрся, ӧтик сӧмын помасяс - мӧд нин заводитчӧма. Кага, гашкӧ, и кӧсйӧ нин кусӧдны телевизор, но ӧд сэні бара нин выль мультик! Ачыс оз кусӧд, быть лоӧ бать-мамлы тайӧс вӧчны. А неважӧн Егор шуӧ - аски ме кута видзӧдны Дисней 5 час асывсянь! Ме шемӧс усьлы, мися, мыйла? Вӧлӧм, реклама мунӧ - 5 час асывсянь луншӧр кадӧдз кутасны петкӧдлыны кутшӧмкӧ мультфильмъясысь подборка. Видзӧд, нинӧм эн думайт, сӧмын пукав да дзоргы экранӧ...

Коли лун куим миян тадзи, телевизор-интернеттӧг олӧмыд, и Егор пи шуӧ - мыйкӧ пӧ менам олӧмыс пыр бурджык и бурджык кутіс лоны. Ме весиг чуйми - кыдз нӧ сідз? А меным юрӧ пӧ кутісны выль мӧвпъяс воны, то ӧтитор пӧ вӧча, то мӧдтор. Гашкӧ, мися, сы вӧсна, мый телевизортӧ он видзӧд да юрыд уджавны заводитіс? Думыштчис, нинӧм эз вочавидз.

Колӧ шуны, мый и ме унатор удиті вӧчны интернеттӧгыд - вӧчи магнита пазлъяс Риталы ворсны, привидениеяс - вуджӧра театр рытнас петкӧдлім, выль ворсӧмъяс думыштім. Быд асыв садйӧ мунӧм водзын Ёгор висьталӧ меным наказ - думышт мыйкӧ выльтор! Ме и думайта.   
пазл матрешка
Татшӧм пазл кокни вӧчны медся ичӧтъяслы
магнита пазл
Магнита пазл ӧшалӧ холодильник вылын
Интернетыд ӧд тшӧтш кыскӧ, тшӧтш кокни вошны сэтчӧ гырысь мортлы... Кыдзи сӧмын кусӧдан интернет, сідз и заводитан думайтны, мый вӧчны да кыдзи вӧчны, сӧвмыны. Некутшӧм абу гажтӧм!

Комментариев нет:

Отправить комментарий